19‏/9‏/2012

أول مــرة


(ـــــــــــ)

هى كُل حاجة حلوة بتحصلنا أول مرة وأحيانا بتبقى مؤلمة وموجعة جداً
                 
زى أول مرة دخلت فيها المدرسة كان يوم بالنسبة لى غير عادى 
إنى كبرت خلاص كده وهشوف ناس تانية غير اللى كُنت عايشة    
معاهم وهبذُل كُل جُهدى عشان أبقى مُتفوقة مع إنى مكُنتش كده
أوى يعنى بس وقتها كانت أسعد لحظة فى حياتى..

وأول مرة المُدرسة عجبها خطى ع الورق وخلتنى أكتب بالقلم 
الجاف بدل الرصاص ساعتها كنت هطير من الفرحة
بس ياريتنى فضلت أكتب بالقلم الرصاص يمكن ساعتها كُنت 
أقدر أمحى أى حاجة فى حياتى مش عايزة أفتكرها..

وأول مرة أتحبيت فيها بالرغم من إنى يمكن مقدرتش أحس بيه
بس كفاية إنى حسيت لأول مرة يعنى إيه إنسان ممكن يعمل أى 
حاجة لمُجرد بس إنك تبادليه مشاعره 
حاجة كده نظيفة وصافية من القلب حُب وخوف من ربنا فى نفس 
الوقت..

وأول مرة أنا حبيت فيها مش مهم الحُب ده كِمل ولا لا بس الأهم
إن قلبى زقزق لأول مرة 
ودى كانت فى حد ذاتها شعور مش مُمكن أوصفه..

كُل دى أحاسيس حلوة أوووى كُل ما بفتكرها بحس من جوايا بشعور غريب وبتمنى لو يرجع بيا عمرى وأعيش اللحظات دى تانى

لكن أيامنا مش هتبقى كُلها حلوة..
فى لحظات جارحة ومؤلمة وأيام مكُنتش بتعرف إذا كانت هتعدى عليك ولا لا

زى أول مرة بكيت بجد
  
وأول مرة أتجرحت من حد كُنت فاكر إنه كان مُمكن يبقى بالنسبة
لك شىء كبير ومُهم لكن طلع عكس كده.. 
وأول مرة اتصدمت من صديق أو صديقة كُنت بتعتبره من عيلتك
وكُل أسرارك معاه
وفى الأخر تكتشف إنه كان معاك مصلحة

وأول مرة حسيت إنك وحيد بالرغم من الناس اللى حواليك

وأول مرة متعرفش تحس بالأمان لاإنك ببساطة بتجهل معناه
ومش لاقى اللى يحسسك بيه بجد

هى أول مرة لكُل حاجة صعبة فى حياتنا هجر وألم وخصام وحاجات تانية كتير مش مُمكن توصفها بكلام أو حتى تكتبها على الورق..

بس لما تبُص على كل الحاجات دى هتلاقى نفسك زى ما حزنت وتعبت فى يوم أكيد برضه فى حاجات فرحتك 

وزى ما أتألمت أكيد لقيت اللى يعوضك عن ألمك وحتى لو ملقتش
أكيد فى يوم من الأيام هتلاقى ولما تصبُر أكتر ربنا يجازيك على صبرك أكتر وأكتر

ومهما أتجرحت أكيد برغم الجرح إتعلمت كتير وأخدت خبرات أكتر بكتير من الجرح اللى أنت حسيت بيه 

يمكن وقعت شوية وحسيت إن الدُنيا سودة بس لما تفوق هتعرف 
إن الدُنيا دى لازم تتعاش بحلوها ومُرها لازم تعيسها
ربنا خلقنا عشان نعيش كُل لحظة فى حياتنا مهما كانت سيئة 
يمكن بيختبر صبرنا أو عشان نأّمن أكتر بإننا لما ربنا يكرمنا بالجنة هيعوضنا عن كُل ألم عشناه

متحاولش تفكر فى حاجة راحت وخلصت من حياتك فكر بس إزاى تكمل اللى باقى من عمرك وأنت راضى عن نفسك 
وإن ربنا أن شاء الله هيرضى عنك

حِب نفسك وعيشها صح ومتحاولش تفكر فى رأى غيرك فيك
عشان رأيك أنت فى نفسك أهم بكتير من الناس 

ومتحاولش تعمل حاجة وإنت مش راضى عنها لمجرد إنها هتلفت الإنتباه ليك أو تخليك مشهور
أعمل بس الحاجة اللى تعجبك وتخليك فى نظر نفسك فخور بنفسك

إعمل اللى أنت شايفه صح مش اللى الناس شايفاه

وحِب الدُنيا والناس برغم ألمك وجرحك هتلاقى قلبك فتح جناحاته ورفرف للحياة

عشان الحُب هو أساس كُل شىء 

هو ده إحساس اول مرة لانى فعلاً أول مرة أواجه نفسى بحاجات 
كتير أوى مكُنتش شايفاها 

خليك صادق قُدام نفسك وأنت تعيش صادق مع كُل الناس طول الحياة

((عُذراً للإطالة))

هناك 4 تعليقات:

  1. فعلا اول مرة بتبقياجمل واصعب مرة
    وعلي اساسها بيتبني حاجات كتير
    يعني اول يوم في المدرسه بيفرق في باقي السنه
    الانطباعالاول بيفرق كتير مع الاشخاص
    وبناخد وقت طويل عشان نتعلم امتي نقول وامتي ما نقولش بس بتبقي خلاص مش اول مرة
    موضوع جميل
    تحياتي

    ردحذف
  2. فعلا البدايات دائما رائعة وما أجمل أن تدوم
    تحياتى لحرفك :)

    ردحذف
  3. يارب دايما اول مرة فى حياتك تبقى طول الوقت
    ويكون دايما احساسك حلو زى اول مرة
    وحشتينى يا ميرو :)

    ردحذف
  4. الإحساس الأول.. سواء إيجابي أو سلبي بيعلم أوي ومابيتنسيش

    بيكون لسه القلب بكر وإحساسه عود أخضر طري..

    حلو أوي أسلوبك.. ومفيش إطالة ولا حاجة.. بالعكس.. كل حاجة كتبتيها كانت في مكانها

    تسلم إيدك

    ردحذف