مامتى حبيبتى بمناسبة انى مش لاقيه كلام أقوله

من كتر البوستات اللى نزلت زى المطرة على الفيس

((ايموشن مذبهل))

وبما أنى كمان مفلسة ومش هجبلك هدية

((ايموشن مطلع جيوبه الفاضية برة))

وأصلا أنا يعنى بالنسبة لك أحلى هدية عشان مفيش منى أتنين

((ايموشن برىء والبراءة هتنط من عنيه))

وطبعا هأجى بقى أقولك كل سنة وانتى طيبة يا مامتى يا حبيبتى  وعقبال مليون سنةوربنا يخليكى ليا والله كان نفسى أجبلك الدنيا 
كلها

((ايموشن سهتان كده ومستهبل))

فطبعا هتردى تقوليلى أنتى هديتى يا حبيبتى

فهرد بسرعة وأقولك طبعا كفاية عليكى أنا

((ايموشن رقيق وبيبربش بعنيه))

وطبعا بقى هقعد أبوس أيديك ورأسك بقى كدهوون وأضحك عليكى بكلمتين 

كالعادة يعنى طبعا ما أنا رئيسة القرع المباشر فى البيت بقى

أحم أحم 

وبما أنى سنجلاية يعنى زى ما أنتوا عارفين

مامتى حبيبتى بقى هتدعيلى دعوة حلوة بعد الكلمتين الحلوين دول

((ايموشن مستغل بقى))

فهتقولى ربنا يرزقك بأبن الحلال اللى يسعدك ويهنيكى

هفرح أنا بقى بالدعوة الجميلة دى

واّاّمن أنا بقى وراها وأزود كام دعوة من عندى

وبعلو صوتى بقى أقول ربنا ما يحرمنى منك يا ماما ولا من دعواتك وفى سرى بقى

*بينى وبينكوا بقى*
((ايموشن بيوشوش أوعوا حد يقولها))

اللهم أرزق أمى زوج لبنتها أميرة((أنا يعنى*_^))

شخصية كده عسولة
ياحبذا لو شبه كريم اللى فى المسلسل التركى بشعره المهفهف ده اللى عقدنى

جنتل كده

ورومانسى أوووووى وبينقط رومانسية ويفأجانى كل يوم بهدية

بيحافظ على صلاته كده ومُحترم

ومامته عسولة وطيوبة

((بس أوعى تكون شبه دُرية حماه فكرة اللى فى الأوراق المتساقطة))

بيضحك على طول كده ودمه خفيف

ومش غلس ولا بيزعق

ويفسحنى كتير ومش بخيل

اهم حاجه ميكنش بخيل مش عوض مثلا

يحلق للعيال بقى

ويحط على العسل مية والكلام الفارغ ده لالالالالا

انا عاوزاه عسول كده

يارب اللهم أسعد قلب مامتى وأستجيب لدعاءها بقى

ربنا يخليها ليا ويكتر من دعواتها

تستاهل الخير مامتى والله

حبيكى انا

*_^

ولما هبقى زعلانة وتيجى عشان تصالحنى

هتنزل دمعة من عينى تقول وقدرت تجرحنى

تبوس أيدى وبوسة كمان على جبينى

وتقولى ها سامحتينى :)

بعينى أبصلك بصة وطاير قلبى م الفرحة :))

وأستغل بقى أنا الفرصة وأقول لا لسة زعلانة:(

فتمسك أيدى وتسبل..

وأنا فرحانة وأستهبل*_^

تقولى ايه اللى يرضيكى..

ده أنا والله بموت فيكى..

وعمرى كله افديكى..

وعلى زعلك والله ما أقدر:))

خلاص مش قادرة أستحمل:)

ومنى هتخرج الضحكة:))

بحبك أصلى وايه أعمل..

ولا أقدر عنك أستغنى*_^

ياريت جوايا أنا قلبين..

وأحبك بيهم الأتنين..

ده أنا دايبة بنظرة عين;)

ومن روحى بقيت أغلى*_^

فيهمس قلبى من جوة..

خلاص الدنيا ضحكتلى..

وم الفرحة بقى أدتنى


وأحلى فرصة قابلتنى..

حبيبى وقلبى وعيونى..

وأفراحى اللى قابلونى..

وبيك أحزانى فارقونى..

ونسونى خلاص أنا مين:))

وتسألنى تحبينى؟؟؟

ومن عمرك هتدينى!!!

قوليها لا تفارقينى عشان خاطرى تجاوبينى..

هقولك أيوة يا عيونى:)

ومهما الناس يلومونى..

هشيلك بين رمشى وجفونى..

بحبك أيوة يا عمرى..

وم الليلة بقيت قدرى..

وبينا يالا ع الجنة..

نعيش أيامنا نتهنى..


ولا يوم عن بعض نستغنى..


يا أول حب فى حياتى..


يانور عينى وتاج رأسى..


أميرى وكل حراسى..


بحبك يا هنا عمرى..


بحبك لو تكون قاسى*_^

أشتاق اِليك ولكنى لا أتكلم

 

أحتاج اِليك ولكنى لا أجدك

 

فالبرد يزيدنى صمتا

 

وشوقى اِليك يشعل فى قلبى وهجا

 

تُرى تلك النار التى بقلبى ستأتى يوما وتمنحنى دفئا

 ❤❤❤

واِن باعدت المسافات بنا فاِن غدا لناظره قريب

نحلم ونعود اِلى حيث كنا وتبقى بقلبى أغلى حبيب

ويا ويلتى اِن باعدت يوما فأنتظر عودتك من الشمس حتى المغيب

فلا تفارقنى يا حب عمرى وكن معى من الصبا وحتى المشيب

 

♥♥♥

 

ياااااااااااااارب

احساس غريب كده بيجيلى كل فترة..

ياترى أنا لو مُت دلوقتى هيحصل ايه؟؟

مين هيحزن لموتى ومين هيفرح؟؟

مين مش فارقة معاه ومين هيحزن من بره لكن اللى جواه جواه؟؟

أصل اللى جوة البنى ادمين ده حاجة ربنا بس اللى عالم بيها...

السؤال بقى؟؟

طب يا ترى أحنا مستعدين نقابل ربنا دلوقت؟؟

ياترى بنعمل كل اللى يرضيه؟؟

ولو سألنا عن حاجه هنعرف نرد؟؟

صلة الرحم..

الصلاة..

الصوم..

الزكاة..

عمل الخير..

بنغض البصر..

ولو أذنبنا ياترى بنتوب وبنوعد ربنا أننا مش هنرجع للمعاصى تانى؟؟

ولا فى وقتها بس بنندم وبعدين خلاص بنرجع لحياتنا عادى..

جوايا حالة خوف أنى مش برضى ربنا..

مع أنى بحاول أرضيه وبعمل كل اللى أقدر عليه..

ياااااااااااااااااااارب لو أذنبت سامحينى

وأرضى عنى وأغفرلى

اللهم أرحم المؤمنين والمؤمنات الأحياء منهم والأموات

 
 

المعاكسة وسنينها *_^

يا سااااااااااااااااااااتر على البنى أدمين

عالم غريبة تحسها غير بقية البشر

هو أحنا يا جماعة بقى دماغنا هتكبر امتى

ونبطل معاكسات بقى والهبل الرسمى ده

يعنى الواحد قال بعد الثورة فى حاجات كتير هتتغير

والناس دماغها هتكبر شوية

ونركز فى أننا ازاى نبقى احسن ونتقدم

بس انتوا بتتكلموا مع مين

((ايموشن باصص للسما وبيصفر))

لا حياة لمن تنادى عالم عجيبة

يعنى مثلا الواحدة تبقى ماشية فى الشارع سرحانة كده مع نفسها

وفجأة كدهون تلاقى اللى نط زى البرشوت وبيعاكس

ايه يا جميل هو القمر بيمشى على الارض ولا ايه

((ايموشن قرفان وماسك شبشب))

ياسااااااتر واد فصيل

وياريتهم بيعرفوا يعاكسوا

زمان كانت البنات بتصدق الحاجات دى وكانوا بيغيظوا بعض

أنا النهارده اتعاكست يا بنات وواحد قالى انتى قمر

تلاقى اصحابها بيبصوا بقرف

((ايموشن بيحقد حقد من المعاميق))

عشان كانوا صغيرين انما دلوقتى خلاص مبقاش الكلام ده ياكل معانا

خصوصا اننا اتعلمنا ودماغنا أشتغلت وعرفنا بقى انهم بيغنوا علينا

وكمان لما حد يقولك يا قمر أكيد بيشتمك ما احنا درسنا كده

القمر معتم يعنى مش حلو يعنى اللى بيعاكس ويقول كده بيبقى بيستهبل

وكمان حاجه بقى غايظانى اوووووى

ياريته اللى بيعاكس ده تحسيه حد نضيف كده

لا ازاى ده بيبقى عامل شعره بجل زحلقة وماليه

تحسيه كده حاجه مقرفة

ولابس شبشب يا عينى أشتكى وصوابعه هربانه منه

وتلاقيها هتصرخ خلاص وتقوله أرجوك أغسلنى

((ايموشن هيرجع من المنظر))

وبعد ده كله يقولك القمر بيمشى على الارض

يعنى حتى مش عارفين هما بيقولوه ايه

حاجه تقرف((ايموشن هيفرقع من الغيظ))

جاك صاروخ فى معاميعك منك له

جتكوا القرف ماليتو البلد

براد الشاى♥♥

((بنات أخر زمن))

ودى طبعا المقولة السائدة فى المواقف اللى بتبان فيها خيبتنا..

وبما أنى خيبة خيبة يعنى قلت تشاركونى الكارثة اللى حصلت النهاردة

كنت قاعدة خير اللهم أجعله خير لا بيا ولا عليا ولا حواليا..

وراحت ماما ندهت عليا يا أميرة أعمليلى شاى بالنعناع

قلتلها حاضر ورحت حطيت البراد على النار

وجيت زى الفالحة قعدت على النت والفيس بوك عادى

((ايموشن مستهبل))

على رأى الكبير أوى(يقطع النت على النتيتة ع اللى عينتتوا عليه)

ونسيت نفسى خاااااااااااااالص وعملت من ليبيا

اذ فجأة بعد يجى ساعة كده ألاقى أخويا بينده عليا بصوت براحة

هو انتى مولعه على البراد فاضى

((ايموشن مبحلق وهيغمى عليه من الصدمة))

يااااااااااالهووووووووووى أه ده انا بعمل شاى لماما

وجريت على المطبخ

هاااااااااااااااار أسووووح

البراد أحمر من كتر ما النار كلت أمه ياعينى

((ايموشن بيلطم وبيقول فى سره هتقطع النهاردة))

المصيبة بقى أن أخويا مش يطفى عليه ويجى يقولى لا ازاى
سابه على النار وجه

وشمرت بقى دراعى وقولت أستعنا على الشقا بالله
وفضلت أمرش أمرش زى عبد العال فى ريا وسكينة أنه ينضف أبدا

أتحرق ياما وأسود سواد الليل..

اّاّاّاّاّاّه يانى ايديا وجعتنى من كتر الدعك

وأنا عاملة فيها سيدة والله يا زمن فى عز التلج

لا والنهاردة الجو كان متوصى بيا أوووووووى

أعمل ايه أنا دوقتى فى المصيبة دى

ماما لو صحيت هتقطعنى

((ايموشن ركبه بتخبط فى بعضها))

فين وفييييييييييين بقى على ما ملامح البراد رجعت تانى
قولت كفاية كده بقى

وماما صحيت ((ايموشن بيقول اتشاهد على نفسك))

وطبعا لانى نيلة مش بعرف أدارى

قولتلها أسكتى مش البراد عمل حادثة واتحرق

وغمضت عينى وقولت دى هتحدفنى بحاجه فى وشى

((ايموشن بيقول ياأرض أنشقى وأبلعينى قبل الموت ما يجينى))

ونزلت الجملة عليا كالصاعقة

خلاص يا فالحة مش هينفع نعمل فيه تانى

أرميه وهنجيب غيره

((ايموشن مفروس وهيطق من الغيظ))

بعد ما أتمرمطت وفضلت أدعك فيه وأيدى أتعورت

تقولى هجيب غيره

اّاّاّاّاّاّاّاّه ياااااااااااااااااااااااااااااااانى

ودى كانت نهايتى مع براد الشاى

وقلت حرمت أحط الشاى على النار وأسيبه تانى

عااااااااااااااااااااااااااااااااااااااااااااااااااااااا

♥♥سأظل دوما أنا♥♥

سأظل دوما أنثى خرافية التكوين♥♥

وكل من لا يعرفنى يشتاق الى♥♥

ومن يعرفنى يتمنى قربى♥♥

فقط بصمتى...

وسكونى....

وبراءتى...

وضحكتى...

أجعل كل من أخطأ فى حقى...

يندم ويتألم...

على ما فعله بى فى يوما من الأيام....

دمتم لى♥♥

يالروعة اللقاء بين أشخاص أبدا لن تراها...

ولكنك قد تراها فى أحلامك....

تسمعها تهمس فى أذنك...

ولكنها أبدا لن تغيب عن مخيلتك...

فقد أضافت شيئا فى حياتك...

وملأت حياتك بالفرحة..والبهجة..والسرور..

فما أجمل اللقاء حين ترى أشخاصا بعين الخيال..

كلما نظرت الى السماء تذكرتهم..

فهذا هو المكان الوحيد الذى يجمعكم ..

وكأن أرواحكم تتلاقى فى السماء...

فتدعو لهم..وتتمنى لهم الخير...

دمتم لى يا من أشعر بكم ولكنى لا اراكم♥♥♥

♥زقزق يا عصفور♥

زقزق يا عصفور.....

غنيلى....

وفى السما لف ودور.....

نفسى أطير وألف معاك بحور....

وأقابل معاك حبيبى...اللى هيرجع لحياتى البسمه ويزيدها نور....

نفسى أطير يا عصفور.....

يمكن مستنينى حبيبى هناك...

ومستنينى أطير وأجيله معاك....

ويطير ويانا فسماك....

يمكن تكون أنت سبب لؤانا....

وفرحتنا وهنانا...

طب يالا غنى معايا...

وخلى الكون كله يسمع غنايا...

خليك معايا يا أحلى عصفور....

دى الدنيا من غيرك بللور مكسور....

خدنى معاك وطيرنى يا عصفور.....