عايزنى اقولك..
إن بعادنا كان غلطة مش مقصودة
وإنى فى قربك كنت سعيدة ومبسوطة
وإن مكانش فيك غلطة ولا حتى فتفوتة
وحياتى بعدك مش مظبوطة....
ولا أقولك..
تعالى ننسى اللى فات
ونعتبره ماضى ومات
وتعالى نحلم ونرَجع من تانى أحلى الذكريات
ولا عايزنى أقولك!!!
إن بعيد عنك حياتى عذاب
وإنى عايشة وسط الناس زى الأغراب
ومعنديش أمل فى حياتى وشايفة قدامى سراب.. فى سراب
وإنى بعدك نسيت الفرحة وعايشة أيامى بقناع كداب
ولا عايزنى أقولك...
تعالى نرجع لبعض تانى
وإن وجودك هيرجعلى بسمتى ويحقق لى أحلامى
ومعاك الدنيا هتضحكلى تانى
ونعيش ونرسم أحلى الأمانى
بس أنت عارف أنا عاوزة أقولك إيه؟؟
عايزة أقولك!!
مع السلامة..
ومش ندمانة..
وعمرى فى بُعدك ما هكون خسرانة
وإزاى أندم على حد معرفش يصون الامانة
ده أنا هكمل حياتى فرحانة
وعمرى فى يوم ما هكون زعلانة
وأزعل ليه على دنيا كدابة
كنت عايشة فيها بطيابة
وأنت رسمتلى فيها حلم بنظرة وضحكة وكلمة خداعة
بس خلاص أحب أقولك أنى فوقت من اللى أنا فيه
وعرفت اللى قدامى ده أصلا إيه
وأتأكدت بجد إنى أتخدعت فيه
وعشت أيام مكنتش عارفة نهايتها إيه
لكن فى النهاية أكتشفت الخداع
وعرفت أنك عايش فى الدنيا بألف قناع
وإنى المفروض مندمش على حد غدر وباع
إنسانى وأنسى اللى فات
لأنى أعتبرته ماضى ومات
وذكراك جوايا بقت شوية مُهملات
مسـاء المكان وما حوى
ردحذف" أميره "
:
ويبقى الشعر العامي ، هو الأقرب للقلوب
نظرا لبساطته و سلاسته ،
ينقصكِ ان تجعلي المقاطع رباعيـات مُنظمة ,
حروفك جميلة ، سلم القلم وراعيته
كل التحية .
..
..
..
أحمــ سعيـد ــد
أنا لسة مبتدئة أحمد
حذفوان شاء الله أحاول
تحياتى ليك:)))
جميله دى اووووى يا اميره
ردحذفانتى أجمل يا دينا:)))
حذفالله الله يا ميرو تحفة
ردحذفهو كدا اللى يبيع مش يستاهل غير الزبالة
عجبتنى جدا جدا :))
أكيد أخرتهم بتبقى كده
حذفتسلمى يا قمر:)))
أكيد عايزك تقولي كدة .. اتعود .. او مش مصدق إنك تقدري تقولي غير كدة ^_^
ردحذفعجبني ردك ف الآخر
تسلم إيدك
كلامى اللى فى الأخر هو ده الاخر:))
حذفاقولك انا بقى
ردحذفقولي كل اللي جواكي وخليه يخبط دماغه في الحيط :)
قولي كل اللي جواكي لاننا بنستمتع بجد لما بنقرا كلامك يا مايرة
حلوة كعهدي بكلامك الجميل و افكارك الرقيقة
تحياتي ليكي ولابداعك :)
من عيونى يا منة هقول دايما اللى جوايا
حذفمبسوطة اوووى انها عجبتك:))