13‏/7‏/2012

أقولك إيه؟؟

عايزنى أقولك إيه؟؟
عايزنى اقولك..
إن بعادنا كان غلطة مش مقصودة
وإنى فى قربك كنت سعيدة ومبسوطة
وإن مكانش فيك غلطة ولا حتى فتفوتة
وحياتى بعدك مش مظبوطة....
ولا أقولك..
تعالى ننسى اللى فات
ونعتبره ماضى ومات
وتعالى نحلم  ونرَجع من تانى أحلى الذكريات
ولا عايزنى أقولك!!!
إن بعيد عنك حياتى عذاب
وإنى عايشة وسط الناس زى الأغراب
ومعنديش أمل فى حياتى وشايفة قدامى سراب.. فى سراب
وإنى بعدك نسيت الفرحة وعايشة أيامى بقناع كداب
ولا عايزنى أقولك...
تعالى نرجع لبعض تانى
وإن وجودك هيرجعلى بسمتى ويحقق لى أحلامى
ومعاك الدنيا هتضحكلى تانى
ونعيش ونرسم أحلى الأمانى
بس أنت عارف أنا عاوزة أقولك إيه؟؟
عايزة أقولك!!
مع السلامة..
ومش ندمانة..
وعمرى فى بُعدك ما هكون خسرانة
وإزاى أندم على حد معرفش يصون الامانة
ده أنا هكمل حياتى فرحانة
وعمرى فى يوم ما هكون زعلانة
وأزعل ليه على دنيا كدابة
كنت عايشة فيها بطيابة
وأنت رسمتلى فيها حلم بنظرة وضحكة وكلمة خداعة
بس خلاص أحب أقولك أنى فوقت من اللى أنا فيه
وعرفت اللى قدامى ده أصلا إيه
وأتأكدت بجد إنى أتخدعت فيه
وعشت أيام مكنتش عارفة نهايتها إيه
لكن فى النهاية أكتشفت الخداع
وعرفت أنك عايش فى الدنيا بألف قناع
وإنى المفروض مندمش على حد غدر وباع
وببُعدك عنى خسرتنى وحكمت على نفسك بالضياع
وأخيراً هقولك...
إنسانى وأنسى اللى فات
لأنى أعتبرته ماضى ومات
وذكراك جوايا بقت شوية مُهملات

هناك 10 تعليقات:

  1. مسـاء المكان وما حوى
    " أميره "
    :
    ويبقى الشعر العامي ، هو الأقرب للقلوب
    نظرا لبساطته و سلاسته ،
    ينقصكِ ان تجعلي المقاطع رباعيـات مُنظمة ,
    حروفك جميلة ، سلم القلم وراعيته
    كل التحية .

    ..
    ..
    ..

    أحمــ سعيـد ــد

    ردحذف
    الردود
    1. أنا لسة مبتدئة أحمد
      وان شاء الله أحاول
      تحياتى ليك:)))

      حذف
  2. جميله دى اووووى يا اميره

    ردحذف
  3. الله الله يا ميرو تحفة
    هو كدا اللى يبيع مش يستاهل غير الزبالة
    عجبتنى جدا جدا :))

    ردحذف
    الردود
    1. أكيد أخرتهم بتبقى كده
      تسلمى يا قمر:)))

      حذف
  4. أكيد عايزك تقولي كدة .. اتعود .. او مش مصدق إنك تقدري تقولي غير كدة ^_^

    عجبني ردك ف الآخر

    تسلم إيدك

    ردحذف
    الردود
    1. كلامى اللى فى الأخر هو ده الاخر:))

      حذف
  5. اقولك انا بقى
    قولي كل اللي جواكي وخليه يخبط دماغه في الحيط :)
    قولي كل اللي جواكي لاننا بنستمتع بجد لما بنقرا كلامك يا مايرة
    حلوة كعهدي بكلامك الجميل و افكارك الرقيقة
    تحياتي ليكي ولابداعك :)

    ردحذف
    الردود
    1. من عيونى يا منة هقول دايما اللى جوايا
      مبسوطة اوووى انها عجبتك:))

      حذف